Segredu ba diskursu públiku ida-ne'ebé diak

Diskursu Públiku mak métodu aprezentasaun ida-ne'ebé ita uza atu halo persuazaun argumentativa hodi hetan públiku nia konkordasaun kona-ba mosaun ne'ebé ita aprezenta. No iha Timor-Leste ida-ne'e sai nudar modalidade akadémika ida-ne'ebé estudante universitáriu barak iha interese atu partisipa bele nudar oradór no mos nudar audiénsia. No tuir makerek nia observasaun Timor-Leste nia foinsae barak mak iha poténsia iha área ida-ne'e, ho nune'e ho nia esperiénsia, makerek hakarak fahe nia téknika sira ba diskursu públiku ida-ne'ebé efetivu no diak liu.

1. Projeta Ita-bo'ot nia lian

Problema bo'ot ida-ne'ebé ha'u nota maka barak dependente liu ba forsa sónika husi mikrofone, no lakon toman atu projeta nia lian ba públiku. Dala barak, wainhira Ita fo diskursu, iha toman ida atu se besik mikrofone ba ibun, ho ida-ne'e, mosu tendénsia atu hakiik Ita-nia lian, no halakon toman atu hasa'e lian hodi ema bele rona wainhira Ita hala'o diskursu públiku sein mikrofone. Iha mos kazu balun ne'ebé Ita-nia projesaun lian la forte tanba Ita-nia postura ladun di'ak, atu hadian ne'e, Ita presiza hatoman an hamriik loos no pratika diskursu iha espellu hodi bele haree Ita-nia imajen wainhira ko'alia. Noin ida tan mak atu imajina dehan Ita-bo'ot ko'alia direta ba iha ema ida ne'ebé iha kotuk liu iha salaun aprezentasaun nian, koko atu sukat hodi ema ida iha kotuk liu bele rona Ita-nia lian. 

2. Mantein kontaktu vizuál (matan)

Loos duni, diskursu públiku dirije ba ema barak, maibé ida-ne'e la limita Ita-bo'ot sira atu koko fihir audiénsia iha matan. Ida ne'e ajuda halo relasaun entre Ita-bo'ot ho audiénsia, fo sinál ida ba sira katak Ita la ko'alia de'it jeralmente ba audiénsia, mas foka mos ba individuál ida-ida. Ne'e sei obriga sira atu toma atensaun liuhusi kontaktu matan. Wainhira Ita-nia mentál sei fraku, koko atu fihir ba iha parede kotuk liu, ba audiénsia sira-nia kotuk, ida-ne'e sai nudar étapa dahuluk ida molok hakat ba faze daruak. Wainhira toman ona, koko atu fihir ema nia rentoos, ida-ne'e, husi do'ok fo iluzaun ida katak Ita-bo'ot fihir direta ema nia mantan, (sorry, matan XD). Wainhira ida-ne'e mak Ita-bo'ot toman ona, koko fali atu fihir idaidak nia matan wainhira ko'alia ba audiénsia sira, muda ba fali seluk, koko fihir liu liu. 

3. Mantein balansu entre seriedade no umór

Tenke iha balansu entre seriedade no umór, wainhira Ita ko'alia asuntu sériu, koko atu fo mos tempu ituan ba buat balun ne'ebé ho umór, ka komik. Ida-ne'e sei halakon monotonia husi Ita-nia diskursu no fo pauza ituan ba iha audiénsia nia neon ne'ebé prosesu hela liafuan sériu sira durante Ita-nia diskursu ne'e, aleinde ne'e, nia mos sei kria iska ida atu dada fali audiénsia sira-nia atensaun. Importante tebes mai Ita-mos atu hatene atu la aumenta liu umór ba kazu sériu tanba ida-ne'e sei hatudu Ita-bo'ot nudar ema Ida-ne'ebé la iha seriedade no intensaun atu hala'o diskursu, hodi nune'e, koko atu kria balansu. 

4. Uza pergunta retórika

Pergunta retórika maka pergunta sira-ne'ebé la presiza interlukutór atu hatan tanba nia resposta ne'e tama tiha iha sensu komún, katak ema hotu hatene nia resposta. Hanesan mos umór ida-ne'e serve mos nudar kail ba audiénsia sira-nia atensaun. Pergunta retórika sira obriga reasaun involuntária, audiénsia sei sente nesesidade atu hatan, ne'e kria interasaun entre oradór ho nia audiénsia. 

Konkluzaun

Iha modalidade diskursu públiku, iha maneira barak mai ita atu hato'o ita-nia lian, maneira sira temi iha leten ne'e sai nudar mata-dalan kiik-oan ida atu sira-ne'ebé iha interese atu tuir bele banati no koko atu aplika iha sira-nia lala'ok diskursu públiku, espera katak nia bele ajuda belun balun atu bele hafurak nia aprezentasaun verbál ba ema barak ho diak.