Identifika ita-nia tipu matenek
Iha prekonseitu barak mak mosu kona-ba lalaok aprendizajen nian. Barak
sente obrigasaun atu xave nia an iha kuartu laran, hamanas matan ba iha parágrafu
atus ba atus durante oras barak nia laran atu de’it komprende matéria husi
dixiplina ida. Barak mos sente obrigasaun atu memoriza parágrafu sira-ne’e,
husi hun to nia rohan. Sa-ida mak Ita-bo’ot sira-nia noin wainhira ha’u dehan
ida-ne’e laos lalaok loloos atu estuda?
Burn-out
Molok ita hakat ba faze dahuluk ho lalaok estudu nian, ha’u hakarak koalia
ituan kona-ba burnout. Burn-out ne’e katak fallansu ida-ne’ebé mosu
wainhira ema ida obriga nia an atu halo bu’at ruma ne’ebé ho obrigasaun másima,
no la tuir nia vontade rasik. Imajina motór ida-ne’ebé Ita-bo’ot sira uza
bebeik, no haluhan enxe nia bee radiadór, obriga de’it to destinu, sa-ida mak
sei akontese wainhira Ita la’o iha oras barak nia laran no la para? Bee
radiadór sei maran, Ita-nia motór mos hahuu manas, ikus liu, wainhira obriga
liu nia limite, motór sei aat. Motór ne’e mak Ita-bo’ot sira-nia estudu, no
radiadór nia bee ne’e mak Ita-nia vontade atu estuda, wainhira maran (la iha)
no Ita-bo’ot sira obriga an atu estuda, kakutak mos sei manas no sei rekuza atu
simu informasaun foun. Estudu mos sei aat.
Estudu ho diak mak hanusa?
1.
Set
no Intervalu
Estudu ida-ne’ebé efetivu liu mak ida-ne’ebé respeita limite naturál husi ema
nia kakutak. Ita tenke trata ita-nia estudu hanesan ezersísiu fíziku ida-ne’ebé
loloos. Fahe Ita-bo’ot sira-nia estudu loron-loron nian ba sesaun, ka sets ne’ebé
kontein interval entre set ida-ida. Ida-ne’e fo tempu ba Ita-bo’ot
sira-nia kakutak atu hamalirin an, atu bele absorve ho didiak informasaun ne’ebé
iha. Wainhira Ita-bo’ot sira obriga atu sena informasaun ba neon, Ita-nia kakutak
sei sai hanesan kopu ida-ne’ebé simu bee husi torneira to’o bee sira-ne’e fakar
estraga. Estuda ba durante minutu 20, halo intervalu durante minutu 10, no
repete fila-fali, Ita sei nota katak iha oras ida nia laran, Ita-bo’ot sira sei
aprende liu fali estudu oras rua ne’ebé laek intervalu.
2. Deskansu
Ita tenke mos kontra ita-nia deskansu loron-loron nian. Susar mai ema ida
atu mentalmente funsiona ho diak wainhira nia kakutak la deskansa ho sufisiente.
Ezersísiu mentál hanesan estudu presiza repouzu ne’ebé mak barak, koko atu
mantein Ita-bo’ot sira-nia tempu deskansu loron-loron nian atu la tun husi oras
8. Kakutak ida-ne’ebé fresku sei prosesa informasaun ho efisiénsiu liu duke
kakutak ida-ne’ebé kolen.
3.
Identifika Ita-nia tipu matenek
Atu garante presesu estudu ida-ne’ebé diak liu, ita iha obrigasaun atu hatene
meiu ida-ne’ebé ita-nia neon bele prosesu lalais liu. Ida-ne’e katak, ita tenke
deside karik meiu eskritu (leitura), ka gráfiku (vizuál), ka sóniku (lian) mak
adekuadu liu ba ita-nia métodu aprendizajen. Ita tenke hatene ita-nia tipu
intelijénsia. Psikólogu
a. Matenek Naturalista
b. Matenek Espasiál
c. Matenek Isik
d. Matenek Muzikál
e. Matenek Dalen
f.
Matenek
intrapesoál
g. Matenek interpesoál
h. Matenek lojiko-matemátika
a)
Matenek
naturalista mak sa-ida?
Matenek naturalista, hanesan nia naran sujere, mak matenek ida-ne’ebé ho
baze naturál, ka relasiona ho natureza. Ema sira-ne’ebé ho matenek naturalista
iha kbiit atu komprende formasaun jeográfika (mapa), distinge ai-horis sira,
hatene animál sira-nia moris, no hatene oin-sa mak moris iha natureza, ezemplu
husi ema sira ho matenek naturalista mak ita-nia maluk lia-nain sira-ne’ebé
hatene bainhira mak tempu udan no bailoron mai, hatene oin-sa mak udan sei
afeta rai, no ita-nia maluk agrikultór sira-ne’ebé la presiza formasaun atu
hatene oin-sa hakiak animál no kuda ai-horis. Área sira-ne’ebé ema ho matenek
hanesan ne’e merese atu hola parte no koko atu dezenvolve sientífikamente mak
siénsia naturál, agrikultura, meteorolojia, botánika, saúde animál, no seluk
tan.
b)
Matenek
espasiál mak sa-ida?
Matenek espasiál refere ba matenek ida-ne’ebé bele vizualiza espasu,
dimensaun, naruk no luan, no seluk-seluk tan. Ema sira-ne’e bele identifika no
prosesu informasaun sira-ne’ebé mai ho meiu vizuál. Imajen no gráfiku sai nudar
elementu efikás ida ba sira-nia prosesu aprendizajen. Ezemplu husi ema sira ho
matenek nune’e mak badain sira. Sira iha kbiit atu vizualiza objetu (uma,
porezemplu) iha rai mamuk sira. Sira iha abilidade atu halo reál sira-nia vizualizasaun
ho viabilidade ne’ebé aas liu ema sira seluk. Área relevante ba matenek nune’e
mak belas-artes, jeometria deskritiva, karpintaria, arte dijitál no mos
arkitetura.
c) Matenek isik mak sa-ida?
Matenek isik refere ba sira-ne’ebé iha abilidade atu kontrola sira-nia isin,
no konxiente ho sira-nia estrutura korporál. Ema sira ho matenek ida-ne’e iha
dezempeñu fíziku ne’ebé aas no moris ne’ebé ativu liu sira seluk. Sira bele
akapta movimentu fíziku ho lais no bele mos hatuir ezemplu husi movimentu
sira-ne’e, sira-nia kbiit iha kordinasaun isin-neon bo’ot liu normál, no iha
refleksu ne’ebé lais no dezempeñu aeróbiku ne’ebé diak liu, aleinde ne’e sira
iha vantajen bo’ot iha koreografia fíziku (artes-marsiais no dansa). Ho nune’e,
sira-nia saida ne’e mak diak liu mak iha área desportu no performance arts hanesan
acting no dansa.
d)
Matenek
muzikál mak sa-ida?
Matenek muzikál halai liu ba iha área lian nian, hanesan múzika. Ema sira
ho matenke hanesan ne’e iha kbiit atu distinge lian, distinge volume no
velosidade husi lian, tempo no mos variasaun sónika sira seluk. Sira iha kbiit atu
duplika lian ne’ebé sira rona no mos forma armonia sónika (kompozisaun muzikál)
ne’ebé mak diak. Sira iha don iha produsaun muzikál, no bele identifika padraun
sónika no memoriza sira. Ema sira ho matenek nune’e aprende lalais liu liuhusi
rona duke liuhusi haree no leitura. Saida diak ba ema sira ho matenek muzikál
mak kantór, kompozitór no produtór muzikál, enjeñeiru son no tokadór
instrumentu.
e) Matenek dalen mak sa-ida?
Matenek dalen maki ida-ne’ebé refere ba ema sira-ne’ebé iha abilidade atu
foti dadus liuhusi meiu verbál no komunikasaun. Ema sira monu iha kategoria
ida-ne’e iha abilidade atu identifika padraun linguístika hanesan sotake (logat),
formasaun frázika, liafuan sira-nia signifikadu liuhusi rona no lee. Matenek dalen
sira bele estuda ho fásil liuhusi rona no lee, hakerek no koalia, sira iha
vantajen bo’ot atu aprende liuhusi meiu sira hensan semináriu no aprezentasaun
no peskiza liuhusi leitura. Sira bele mos komprende lalais signifikadu husi
liafuan sira-ne’ebé mai husi dalen foun ida wainhira sira iha ona baze iha
dalen ne’e. Sira iha don ba komunikasaun no bele transmite informasaun ho klaru
no efikás liu liuhusi konversa no sorumutu. Ema sira ho matenek nune’e iha
abilidade atu servisu iha área sira hanesan linguístika, eskrita, edukasaun, acting,
no mos diskursu públiku no debate.
f)
Matenek
intrapesoál mak sa-ida?
Matenek intrapesoál mak matenek ida-ne’ebé refere liu ba iha oin-sa ema ida
bele hatene nia psyche ka nia estadu mentál. Ema sira hanesan ne’e
komprende nesesidade psikolójika no hatene oin-sa rezolve problema mentál
sira-ne’ebé nia hasoru. Sira bele identifika estadu emosionál no iha abilidade
atu komunika ho ema seluk ho maneira ne’ebé íntimu liu. Enkuantu matenek isik
refere ba hatene funsionamentu fíziku, matenek intrapesoál foka liu ba neon nia
funsionamentu. Maneira diak liu ba ema sira ho matenek intrapesoál atu aprende
mak liuhusi estudu tuir par no estudu liuhusi konversa, fasil tebes ba sira atu
komprende informasaun liuhusi konversa privada ne’ebé akontese entre sira ho
sira-nia par. Ema sira-ne’e iha abilidade atu servisu iha área sira hanesan
psikolojia no pediatria, akonsellamentu matrimoniál no seluk-seluk tan.
g)
Matenek
interpesoál mak sa-ida?
Matenek interpesóal foka liu ba matenek ida-ne’ebé halai liu ba iha matenek
sosiál. Individu sira ne’ebé soin matenek ida-ne’e iha abilidade atu komprende
situasaun no kontextu sosiál ne’ebé haleu sira. Sira bele hatene oin-sa
komunika ba ema barka no oin-sa habelun no halibur ema. Sira-nia maneira fasil
liu atu aprende mak liuhusi fahe esperiénsia no mos aprezentasaun grupu. Sira
presiza fahe sira-nia matenek no kria forum ka maneira ida atu bele hamosu
diskusaun no liuhusi informasaun sira ema seluk fo durante diskusaun ne’e mak
sira bele prosesa matenek ho diak no lais liu. Saida rekomendada ba ema sira ho
matenek interpesoál mak hanesan polítika, siénsia sosiál, komunikasaun, diplomasia,
no seluk-seluk tan.
h)
Matenek
lojiko-matemátika mak sa-ida?
Matenek lojiku-matemátika mak matenek ida-ne’ebé haree liu ba iha aspetu
lójiku (padraun no premisa) no mos matemátika. Ema sira-ne’e bele interpreta
dadu sira, no foti konkluzaun ne’ebé presizu [akurat (In_Ina)] liu. Sira-nia
pontu forte maihusi leitura no análize gráfiku no numériku, sira iha kbiit atu interpreta
informasaun eskrita no dedús nia signifikadu no objetivu. Sira mos bele deskobre
padraun lójiku no matemátiku ho lalais liuhusi observasaun no prátika. Maneira
fasil ba ema sira-ne’ebé ho matenek ida-ne’e atu aprende mak atu pratika,
observa no lee informasaun sira-ne’ebé sira simu. Área ne’ebé sira-nia prezensa
importante tebes mak iha matemátika, fízika, filozofia, investigasaun kriminál,
no siénsia pura.
Konkluzaun
Liuhusi Howard Gardner nia teoria
ida-ne’e, ita bele deskobre idak-idak nia tipu matenek no nia maneira loloos
atu estuda ho diak. Ida-ne’e sai nudar mata-dalan kiik oan ida, no iha kazu
barak, la sai sasukat absoluta ba iha ema idaidak nia matenek, tanba barak monu
iha kategoria liu ida de’it, balun bele pertense ba kategoria tolu ka haat. Maske
nune’e, importante loos mai ita atu bele identifika ita-nia abilidade no limite
sira atu bele hatene oin-sa mak ita bele estuda ho diak no fasil. Iha tempu
badak, blog ida-ne’e sei koko atu halo publikasaun ida atu bele ajuda ita-bo’ot
sira atu bele komprende ho diak ita-nia modelu matenek. Espera katak publikasaun
edisaun loron ohin nian bele ajuda Ita-bo’ot sira hotu atu bele komprende
didiak Ita-nia an no bele permite Ita-bo’ot sira atu bele to’o iha idaidak nia
poténsia.
Referénsia
Gardner, H. (2011). The theory of multiple
intelligences: As psychology, as education, as social science. Madrid,
Spain: José Cela University. Retrieved July 22, 2023, from https://static1.squarespace.com/static/5c65be2cfb22a5044c764343/t/5c6c783f15fcc04fbd6e61c4/1550612543679/473+-+madrid+oct+22+2011.pdf
Comments
Post a Comment