Sa-ida mak Intelijénsia Artifisiál - IA

Sa-ida mak Intelijénsia Artifisiál?

Intelijénsia Artifisiál ka IA mak teknolojia komputadór ida-ne'ebé fo neon ba mákina sira atu bele aprende no opera mesamesak no mos hala'o servisu independentemente, nia fo kbiit ba mákina sira atu aprende no hetan esperiénsia husi sira-nia servisu no atu bele tetu no foti desizaun. IA ekivale ho mákina nia konsiénsia, no ho avansu iha teknolojia, mákina sira mos iha ona kbiit atu komunika naturalmente ho ema. Ezemplu husi IA mak hanesan Google Assistant, Siri, Bixby, no mos ida daudaun ne'e koñesidu liu CHATGPT, husi OpenAI. IA eziste atu hafasil ema nia moris, no nia eziste iha área barak. Iha publikasaun ida-ne'e ita sei dada-lia ituan kona-ba área sira-ne'ebé IA bele ajuda ema:

Edukasaun

Estudante idaidak iha nia forsa no frakeza ne'ebé la hanesan, no nia métodu aprendizajen mos la hanesan. Ho IA nia algoritmu, manorin sira bele analiza no avalia estudante idaidak nia pontu fraku no forte atu bele buka-hatene sira-nia nesesidade iha prosesu pedagójiku, no bele sujere maneira oin-oin atu haforsa idak-idak nia prosesu aprendijazen. No liuhusi prosesu ida-ne'e IA mós bele fo ajudu presonalizadu ba estudante sira, iha uma. Abordajen ida-ne'e permite komprensaun ne'ebé lalais liu no iha posibilidade atu hasa'e kualidade no dezempeñu akadémiku iha instituisaun sira. 

Iha internet, ita bele hetan IA barak mak bele fornese ajuda iha konsetualizasaun projetu, ideia no mos disertasaun sira. Website sira nune'e fo kmaan ba ema atu hala'o nia servisu no tulun mos atu garante kualidade husi servisu refere. IA balun mos fornese jerénsia ba konteudu hanesan kompozisaun textuál, múzika, arte no seluk seluk tan, aleinde ne'e IA mos bele fornese fonte referénsia ne'ebé relevante wainhira ita halo servisu ruma ne'ebé mak presiza referénsia forte. IA sira-ne'e mos bele ajuda atu halo revizaun no koresaun ba textu sira-ne'ebé Ita-bo'ot sira hakerek, liuliu relasiona ho gramátika no pontuasaun. Maibé IA la'os ajuda de'it estudante sira atu prodús traballu, nia mos bele ajuda manorin sira atu detekta plájiu, ka copy paste, no mos bele ajuda atu revé estudante sira-nia referénsia iha traballu atu la bele iha falsifikasaun iha referénsia intelektuál, aleinde ne'e IA mos iha abilidade atu detekta textu sira-ne'ebé mak hetan produsaun husi IA no la'os orijinál husi ema.

Ho ezemplu sira temi tiha ona ne'e, ita bele nota katak IA iha nia vantajen no desvantajen iha sistema edukasaun, maske nia bele tulun estudante no mestre sira atu elabora traballu ne'ebé ho kualidade, nia mos bele halo estudante sira sai baruk ten no dependente ba teknolojia, maibé ho nia sistema kontra-IA liuhusi detesaun plájiu no mos produsaun-IA nia bele tulun mos atu ita bele detekta orijinalidade husi traballu sira ne'e.

Bem-estár no organizasaun ema idak-idak nian

IA nia prezensa hanesan iha filme Iron-man ne'e la do'ok husi realidade. Iha momentu ida-ne'e Ita-bo'ot sira-ne'ebé lee hela ne'e iha ninia JARVIS rasik iha liman. Google Assistant, Siri,  no Cortana asume funsaun hanesan ho Tony Stark nia ajudante virtuál ne'e. Sira-nia sistema interligadu ho sistema telemóvel ka komputadór nian. Ita bele fo orden ba asistente virtuál sira-ne'e atu ezekuta servisu sira hanesan haree oras, marka oráriu, manda mensajen liuhusi Whatsapp, husu sira atu lee notísia husi internet, lee Ita-bo'ot sira-nia email, no seluk-seluk tan. Sira serve atu tulun ita iha buat kiik oan sira-ne'e. Koko tok dehan: OK Google! Hey Siri! ka bolu tok Cortana!

Ohin loron, ita iha mos teknolojia Smart-Home ka Uma-Matenek. Smart Home utiliza IA nia kapabilidade tomak atu bele kria ezekusaun automátika ba elementu sira-ne'ebé ezistente iha Ita-bo'ot sira-nia uma laran. Liuhusi IA ita-bo'ot sira bele fo orden liuhusi lian de'it iha dapur atu IA loke ahi iha varanda ka hamate koluna iha kuartu laran. IA ba Uma-Matenek mos ajuda iha kontrolu eletrisidade, seguransa, bee, kortina janela, ormatan, televizaun, koluna no seluk-seluk tan. Aleinde ne'e, kompañia hanesan Mi, produtór telemovel no teknolojia robótiku sira, lansa tiha ona produtu robótiku oin-oin ne'ebé ajuda iha servisu uma-laran nian hanesan hamoos rai, dasa-rai no mos haree labarik.

Liuhusi tatudun balun iha leten ne'e ita nota katak funsaun husi IA hahuu ona sai parte integrál ba ema iha nasaun avansada barak, no ita espera katak iha tempu badak, ho kualidade internet no teknolojia ida-ne'ebé diak liu, ita mos bele goza moris husi rikeza teknolójika sira ne'e. Espera katak publikasaun ida-ne'e fo netik roman balun ba iha koñesimentu kona-ba Intelijénsia Artifiál. Iha tempu badak, makerek ba blog ida-ne'e mos sei publika dokumentasaun projetu IA kiik oan ida-ne'ebé mak la'o hela. 

PS: Pájina ida iha blog ne'e prodús husi IA. Buka tok!