MAI ITA KOÑESE - Modelu oioin husi atake online ka HACK

 Modelu oioin husi atake online ka HACK

Iha mundu modern ho avansu teknolójiku ne’ebé mak forte sempre mai ho nia vantajen no mos desvantajen. Maske kazu barak husi hacking seidauk hetan atensaun ho adekuadu, iha diak ida mai ita atu hatene modelu atake sibernétika ne’ebé mak bain-bain akontese iha mundu virtuál. Tuir mai sei iha lista badak ida husi ezemplu oin-oin kona-ba atake sibernétika sira-ne’e.

 
1.      Denial of Service ka DOS no DDOS (Distributed Denial of Service)

Objetivu husi atake DOS mak atu hatodan prosesu iha website ida liuhusi hato’o pedidu sistemátiku ho frekuénsia ne’ebé lalais no kuantidade ne’ebé barak, hodi nune’e website ida la bele atu funsiona ho normál. Atake ne’e bain-bain uza atu hamate kompetisaun liuliu iha website sira ne’ebé fan sasán online ka website sira-ne’ebé oferese servisu hanesan peskiza. Wainhira ita-nia website nia kapasidade servidór kiik, fasil liu ba hacker sira atu ezekuta atake ne’e. Problema bo’ot liu sei mosu wainhira ita-nia website la konsege atende ba pedidu ne’ebé barak, tanba overload sei obriga ita-nia website atu offline, no liuhusi vulnerabilidade ka frakeza ida-ne’e mak atakadór sira sei koko explora ita-bo’ot sira-nia website bele atu instala kódigu sira-ne’ebé bele sai nudar backdoor ka matadalan atu sira bele hetan asesu ba ita-nia website wainhira fila fali online, aleinde ne’e sira bele mos explora informasaun sensitivu sira hanesan dadu pesoál no konta bankária. Baibain, atu prevene atake ida-ne’e, website sira-nia firewall sempre kontein programa atu identifika pedidu ne’ebé inválidu atu kansela prosesu pedidu sira, hodi la hatodan servidór.

 
2.      Man in the Middle Attack

Man in the middle attack sai hanesan atake ida-ne’ebé foka ba kolesaun dadus online sira iha tempu-reál. Nia sai hanesan manu-ain ida ba hacker sira atu bele hatene informasaun sa-ida de’it mak pasa entre dispozitivu rua ou liu. MITM koa koneksaun ne’ebé ita iha ba iha sentru husi internet, portantu, molok Ita-bo’ot sira nia dadu online sira tama ba iha servidór sira, hanesan website no servisu online sira seluk, hacker sira mak sei simu uluk. Atake ida-ne’e serve atu le’e mensajen, identifika website sira-ne’ebé Ita-bo’ot sira vizita hela, no mos hetan asesu ba Ita-bo’ot sira nia fixeiru (file) sira iha telemovel no mos kompuutadór. Maneira atu prevene atake ida ne’e nia susesu mak atu uza enkrisaun (kodifikasaun) dadu ne’ebé mak forte atu nune’e dadu ida ne’ebé hacker sira simu ne’e sai kodifikadu no la hanesan ho dadu sira-ne’ebé ita manda ba servidór. Maneira fasil liu atu prevene ida-ne’e mak ita bele uza Virtual Private Network ka VPN, ba telemovel, Google Playstore oferese aplikasaun barak ne’ebé mak gratis no ita bele fiar. Importante tebes mai ita atu labele liga ba iha WIFI sira-ne’ebé públiku no gratis wainhira ita seidauk iha fiar ba nia fornesedór, tanba sira mak vulneravel liu ba atake sira hanesan ida-ne’e.

 
3.      Phishing Attack

Phishing attack bain-bain akontese liuhusi mensajen no mos e-mail. Dala ruma e-mail sira-ne’e mai ho formatu ida-ne’ebé formál no kredivel, atu bosok ita atu ita bele loke sira-nia website lasu nian. Ezemplu husi kazu hanesan ne’e mak dala-ruma ita simu e-mail dehan ema balun koko atu tama ba Ita-bo’ot nia konta Facebook, no ita tenke troka password liuhusi link ida-ne’ebé sira fo iha e-mail ne’e. Objetivu husi ida-ne’e mak atu hetan Ita-bo’ot sira-nia kredensiál ka informasaun sensitivu hanesan konta uzuáriu no mos password. Eziste mos kazu balun ne’ebé sira sei husu Ita-bo’ot sira atu loke link atu download software sira hanesan antivirus ne’ebé sei kontein trojan (trojan – software ka kódigu ida-ne’ebé mak sei fo asesu ba hacker sira atu kontrola no explora Ita-bo’ot nia dispozitivu sira).

 

4.      Ransomware

Ransomware mak atake ida-ne’e utiliza troja ne’ebé sikat subar iha software sira-ne’ebé Ita-bo’ot instala ba iha komputadór. Atake ida-ne’e akontese wainhira Ita-bo’ot sira download software sira-ne’ebé mai husi website ne’ebé la iha viabilidade, ou liuhusi CD software sira-ne’ebé Ita hola iha loja sira ho folin baratu. Wainhira hacker sira hetan asesu ba ita-nia dispozitivu, sira sei halo enkrisaun (kodifikasaun) ba Ita-bo’ot sira-nia fixeiru (file) sira, liuliu hanesan WORD no EXCEL, liuhusi ne’e, Ita-bo’ot sei simu mensajen anónimu ida-ne’ebé sei fo instrusaun ba oin-sa mak ita bele hetan fali asesu ba fixeiru ida-ne’e, ne’ebé bele de’it rezolve ho OSAN, maske nune’e, la iha garantia katak sira sei desifra (deskodifika) Ita-bo’ot sira-nia fixeiru. Ida ne’e akontese mos normalmente iha instalasaun Windows husi CD ka USB ne’ebé nia fixeiru instalasaun rasik hetan modifikasaun atu kontein kódigu la diak sira-ne’e, portantu kuidade ho instalasaun software no mos sistema operativu ne’ebé mak la kredivel.

 
Konkluzaun

Importante loos mai ita nudar utilizadór ba komputadór no telemovel sira atu kuidade ho ita-nia konsumu internet. Iha ema barak mak ho intensaun la diak no bele prejudika ita-nia moris liuhusi atake sira hanesan sira-ne’ebé temi tiha ona iha leten. Ita tenke hatene atake sira-ne’e nia modelu no sira-nia objetivu, no ita tenke mos hatene oin-sa mak ita bele prevene atake sira-ne’e. Portantu, keta haluha atu haforsa Ita-bo’ot sira-nia firewall, kuidade ho e-mail no mensajen sira-ne’ebé ita simu, no hanoin didiak molok instala software no hola CD sira ne’e ita atu instala ba iha ita-nia dispozitivu sira.